Terima Kasih Kaban Part 2

13 haribulan 9 taun 2018
Sekali agi aku nurun enggau orang berkursus. Mayuh penemu baru ulih maya kursus tu. Lalu udah pulai ari kursus tu meh aku netapka ati deka muka kebun chabi fertigasi dandang besai. Pasal market, kira udah ulih atur. Lantang asai ati.

10 haribulan 10 tahun 2018
Aku ngaji orang deriba kubi kena nyungkur lalu ngerata ke tapak kebun. Enda mukai-mukai musim ujan pan belabuh. Pengawa nyungkur suah tejanggal laban hari ujan. Tanah ke disungkur nyau luchak. Nambahka nya, orang ke deriba kubi pan bisi komitmen bukai, nya alai pengawa ngerata ke tapak kebun nyau lebih sebulan.

Puji Tuhan, lantang ati meda tapak kebun udah tembu dirata. Semina tanah ia ke agi luchak laban hari selalu ujan.

Lalu sekumbang musim ujan nya, aku meratika chabi ke ditanam aku ba belakang enggau tisi rumah aku di Saratok rusak kena serang penyakit. Buah ia bulat lalu ruruh. Apu! Enda ulih ti baka tu, ku aku bejaku kediri.

Berindik ari penusah chabi kena serang penyakit maya ujan nya aku mutus ati deka ngena Sistem Pelindung Hujan [SPH] tauka lebih munta disebut kitai, rumah chabi. Hahaaa... Penguntung ti nanam chabi dalam SPH tu, kitai ulih ngurangka pengerusak buah maya musim ujan lalu kos ngerachun ia pan kurang.

Udah ke berunding enggau Mr. Jilum sereta pengari ari Kina Agrofarm, aku minta sida ngaga ke aku 2 buah SPH. Pemesai siti-siti SPH nya ianya 20x80 kaki.


24 haribulan 10 taun 2018
Aku nyain sempekat enggau Kina Agrofarm. Sida setuju deka ngaga 2 buah SPH.


27 haribulan 11 taun 2018
Pengawa ngaga SPH ba kebun aku belabuh. Besampi ngagai TUHAN ngarapka IA merekat pengawa aku lalu pulai ke pemujur.

Terima Kasih Kaban Part 1

Pengerindu bekebun tu udah lama di ati. Tang pengawa sereta endur kerja ke jauh nyadi penanggul kelimpah ari penemu ti mabu.

Bulan 5 taun 2016
Kami menyanak pindah ngagai rumah ke dibeli enda jauh ari pasar Saratok. Laban ke bulih lot tisi, bisi ga tanah mimit endur bekebun. Tanah ba belakang sereta tisi rumah umbas ia pemesai. Tang meh tanah balat kusi sereta bebatu laban disungkur maya rumah nya digaga suba. Rumput pan semadi tumbuh, anangka utai tanam.

Kena mantupka tenguk, aku nanam bunga sebelah pasu ngena tanah ke dibeli. Berapa kali meli tanah bungkus maya ke nemuai ke Kuching. Tang ati bedau tentu puas. Ati keran agi deka betanam sayur, ngicha bisi ke kena diri menyanak pama meh.

Bulan 10 taun 2017
Enda mukai-mukai bisi siku kaban ke kala sama gawa enggau aku mesej ngagai aku.

"Kati amat deka bekebun nuan pengajar?" ku ia.

"Amat pengajar, tang meh tanah ke nadai endur bekebun," pia ku aku.

"Enti pia, aku bisi chara nulung nuan tang bisi ungkus mimit," ku kaban aku nya nyambung randau.

"Chara nama nya pengajar?" Ati aku belabuh gagit.

"Ngena chara fertigasi."

Fertigasi? Lama aku enda nyaut mesej ia. Kala ga aku macha pasal bekebun ngena chara fertigasi tu tang semina ngelansa aja.

"Ngena chara tu, tanah ukai nyadi penanggul laban nuan nadai nanam sayur ba tanah," pia ku ia nerang ngagai aku.

"Au, barang ia meh pengajar." Aku mutus ati deka nguji.

Randau kami duai pan panjai.


17 haribulan 11 taun 2017
Kaban aku nya ngaturka aku set kebun fertigasi 18 polibeg. Ia nanam ka aku 12 pun chabi sereta 6 pun tomato cheri. Nya meh keterubah aku meda chara bekebun fertigasi.

Bepun ari sari nya, aku mayuh betanya ngagai kaban aku nya sereta mega ngiga penemu ari macha sebelah internet. Ati chukup gagit meda chabi enggau tomato majak galak lalu mansut ka asil.

Aku mega nguji nanam terung, buah semangka, chabi sereta tomato.

Terima kasih besai akih pengajar Lila Umar, orang ti udah muka jalai sereta penemu ngagai aku.

Kebun mit ba belakang dapur serta tisi rumah, endur aku ngiga peneleba

23 haribulan 4 taun 2018
Dikena nambahka penemu, aku enggau Kursus Nanam Halia enggau Chabi Fertigasi ba Kina Agrofarm. Mayuh penemu ulih maya kursus tu. Lalu ari kursus tu mega aku tebuka runding deka muka kebun dandang besai. Tang meh ati bedau berani nguji. Tusah...

Maya kursus tu mega aku bekelala enggau penceramah ianya Encik Jilum Makup, Penolong Pegawai Penyelidik Kanan MARDI Sarawak. Encik Jilum tu meh orang ke chukup mayuh mantu aku ari segi lalau serta buah runding. Terima kasih besai ngagai nuan Encik Jilum ti chukup mentas, nadai belampung ati nulung enti maya aku suntuk penemu.

Bulan 8 taun 2018
Aku bekelala enggau siku kitai bansa ke udah mujur ngereja kebun chabi fertigasi dandang besai [2000 pun]. Aku ngelala kaban tu ari siku kaban pengajar. Taja baru bekelala tang unggal Jimmy tu chukup kemerah. Aku dikangauka ia nemuai ngagai kebun chabi ia. Nya peluang ti chukup beguna ti sigi enda aku basau ngapa. Meda pemujur pengawa unggul Jimmy tu sereta jaku peransang ia, ati makin keran deka bekebun chabi ngena chara fertigasi.

Pejalai sigi enda mudah. Macham penanggul nuntung.

Maya ati keran sereta penemu menga mit udah ga bisi, tang siti penanggul besai ke selalu ngeregau runding aku ianya MARKET. Enti nyema aku muka kebun chabi dandang besai, kini tunga aku nyual asil ia? Ba tamu pasar Saratok? Jual ngagai bala kaban?

Enda chukup! Pasaran tauka market nya enda chukup. Enda alah chabi buruk ngapa nadai orang meli. Rugi besai enti baka nya. Ngelu pala berundingka baka ni deka mutar ke penekul nya.

KATI MUJUR TAUKA ENDA NIAT ATI AKU DEKA MUKA KEBUN CHABI FERTIGASI DANDANG BESAI?

Besambung...

Bekebun Chara Fertigasi [1] Nyediaka Tapak

Kati udah bisi runding deka bekebun ngena chara fertigasi?
Enda nemu nama sayur deka ditanam?

Diatu orang mayuh nanam chabi ngena chara fertigasi. Kebuah pia, peminta ngagai chabi ba pasaran kitai di Malaysia diatu majak tinggi. Chabi ke ditanam di menua kitai ditu bedau chukup nampung peminta mensia mayuh. Nya kebuah orang mayuh deka nguji nanam chabi.

Ok,anggap aja kitai deka nanam chabi.

Udah milih nama sayur deka ditanam, nama utai patut digaga udah nya?

Ha... TAPAK KEBUN

Tapak tauka palan endur bekebun tu pekara ke pemadu beguna ti deka ngepunka pengawa bekebun ngena chara ferigasi. Ari tapak nya tadi kitai ulih nganggarka berapa polibeg chabi deka ditanam kitai. Besai agi tapak, mayuh agi polibeg ulih diatur.

Tapak kebun fertigasi mesti dirata ke enggau manah. Ingat, tapak mesti RATA! Enti tapak enda rata, dia penyampau ai baja ke disalir ngena paip ngagai polibeg enda bela. Nya tau ngujungka pemansang sereta pengalak chabi ke ditanam enda sebaka.

Tapak kebun mestidirataka enggau manah

Ungkus Bekebun Chara Fertigasi

Mayuh orang nangi deka ngepunka bekebun ngena chara fertigasi. Kebuah pia, laban ungkus deka ngepun ke bekebun ngena chara tu mar. Sigi amat. Sigi deka mar mimit ungkus ia kelebih agi enti nuan deka bekebun bedandang besai. Tang enti semina deka bekebun sebelah ujung bilik, ujung tanju tauka ba tisi rumah, ungkus ia enda bangat mar.

Ungkus mar tang enti ditinjau ari jangka panjai, ungkus tu chukup murah. 

Baka ni tau bakanya? 

Ungkus ke mar tadi dikena ngepun ke pengawa bekebun ngena cahara fertigasi ianya dikena bebelika polypipe, timer, pam, perengka penyambung baka sida T, L, perengka penyiram baka dripper serta meli polybeg enggau sabut nyiur.

Tang semua perengka tu semina dibeli maya kitai deka ngepunka pengawa bekebun ngena chara fertigasi. Udah nya nya enda ibuh meli perengka nya agi dalam timpuh beberapa taun. Sabut nyiur mega ulih dikena dalam timpuh 2 ke 3 taun, nitihka penyiru kitai nyaga ia. 

Ungkus ke ditanggung kitai udah nya semina ungkus baja sereta rachun! Ungkus [bil] ai enggai elektrik pan bengantung ngagai pemesai dandang kebun.

Nya kebuah aku madahka ungkus ngepun ke pengawa bekebun ngena chara fertigasi tu enda mar.

Fertigasi?

Fertigasi tu berasal ari leka jaku orang putih ianya fertilizer enggau irrigation. Ngena chara tu, pengawa maja enggau nyiram digaga bereta. Disimpulka ngena jaku pandak, fertigasi tu ianya sebengkah chara bekebun moden, ianya ai baja disalur terus ngagai urat utai tanam ngena cara nitik nengah hos mit. Penyampau ai baja ke disalir tu begantung ngagai timer ke udah diset.

Pelan chara bekebun fertigasi
Sumber: wnragro.com

Kebun fertigasi

Bekebun ngena chara fertigasi tu nadai nguna tanah tang ngena sabut nyiur [cocopeat]. Nya alai, penyakit ke dibai tanah [soil borne disease] ulih dikurangka enti bekebun ngena chara fertigasi tu. Tu ngujungka asil ke diulih deka mayuh agi ari ke bekebun ngena chara lama.

Bekebun chara fertigasi nadai nguna tanah kena betanam tang ngena
sabut nyiur ke udah di ijnin alus ke lalu diisi dalam polibeg.

Selamat Bekelala

         

          Selamat datai ngagai blog aku tu. Nyadi blog tu dipelabaka aku blog keterubah dalam jaku Iban ke deka bekunsi senentang pengawa bekebun ngena chara tauka sistem fertigasi.

       Nya alai, aku enggau naka ulih nerangka chara sereta tips bekebun ngena sistem fertigasi tu ngena jaku kitai Iban. Nyangka bisi sekeda leka jaku Bahasa Melayu nya enda ulih dikalihka aku ngena leka jaku Iban, aku minta ampun dulu. Nambahka nya, taja blog tu ngena jaku Iban, tang nyangka bisi sekeda leka jaku tauka rambai jaku ke dikena ditu ukai standard jaku Iban ke betul. Sekali agi aku minta ampun.

      Nyadi tuju blog tu digaga ianya deka bekunsi enggau semua bala pemacha senentang chara bekebun ngena chara baru ianya chara fertigasi. Tips ke dikunsi ditu ianya ulih aku ke enggau orang kursus, ari bacha sereta ari peneleba [pengalaman] bekebun ngena chara tu.

        Arapka bala kitai bansa ke rindu bekebun bisi bulih penemu baru sereta penguntung lebuh udah nemuai ngagai blog tu.