Terima Kasih Kaban Part 1

Pengerindu bekebun tu udah lama di ati. Tang pengawa sereta endur kerja ke jauh nyadi penanggul kelimpah ari penemu ti mabu.

Bulan 5 taun 2016
Kami menyanak pindah ngagai rumah ke dibeli enda jauh ari pasar Saratok. Laban ke bulih lot tisi, bisi ga tanah mimit endur bekebun. Tanah ba belakang sereta tisi rumah umbas ia pemesai. Tang meh tanah balat kusi sereta bebatu laban disungkur maya rumah nya digaga suba. Rumput pan semadi tumbuh, anangka utai tanam.

Kena mantupka tenguk, aku nanam bunga sebelah pasu ngena tanah ke dibeli. Berapa kali meli tanah bungkus maya ke nemuai ke Kuching. Tang ati bedau tentu puas. Ati keran agi deka betanam sayur, ngicha bisi ke kena diri menyanak pama meh.

Bulan 10 taun 2017
Enda mukai-mukai bisi siku kaban ke kala sama gawa enggau aku mesej ngagai aku.

"Kati amat deka bekebun nuan pengajar?" ku ia.

"Amat pengajar, tang meh tanah ke nadai endur bekebun," pia ku aku.

"Enti pia, aku bisi chara nulung nuan tang bisi ungkus mimit," ku kaban aku nya nyambung randau.

"Chara nama nya pengajar?" Ati aku belabuh gagit.

"Ngena chara fertigasi."

Fertigasi? Lama aku enda nyaut mesej ia. Kala ga aku macha pasal bekebun ngena chara fertigasi tu tang semina ngelansa aja.

"Ngena chara tu, tanah ukai nyadi penanggul laban nuan nadai nanam sayur ba tanah," pia ku ia nerang ngagai aku.

"Au, barang ia meh pengajar." Aku mutus ati deka nguji.

Randau kami duai pan panjai.


17 haribulan 11 taun 2017
Kaban aku nya ngaturka aku set kebun fertigasi 18 polibeg. Ia nanam ka aku 12 pun chabi sereta 6 pun tomato cheri. Nya meh keterubah aku meda chara bekebun fertigasi.

Bepun ari sari nya, aku mayuh betanya ngagai kaban aku nya sereta mega ngiga penemu ari macha sebelah internet. Ati chukup gagit meda chabi enggau tomato majak galak lalu mansut ka asil.

Aku mega nguji nanam terung, buah semangka, chabi sereta tomato.

Terima kasih besai akih pengajar Lila Umar, orang ti udah muka jalai sereta penemu ngagai aku.

Kebun mit ba belakang dapur serta tisi rumah, endur aku ngiga peneleba

23 haribulan 4 taun 2018
Dikena nambahka penemu, aku enggau Kursus Nanam Halia enggau Chabi Fertigasi ba Kina Agrofarm. Mayuh penemu ulih maya kursus tu. Lalu ari kursus tu mega aku tebuka runding deka muka kebun dandang besai. Tang meh ati bedau berani nguji. Tusah...

Maya kursus tu mega aku bekelala enggau penceramah ianya Encik Jilum Makup, Penolong Pegawai Penyelidik Kanan MARDI Sarawak. Encik Jilum tu meh orang ke chukup mayuh mantu aku ari segi lalau serta buah runding. Terima kasih besai ngagai nuan Encik Jilum ti chukup mentas, nadai belampung ati nulung enti maya aku suntuk penemu.

Bulan 8 taun 2018
Aku bekelala enggau siku kitai bansa ke udah mujur ngereja kebun chabi fertigasi dandang besai [2000 pun]. Aku ngelala kaban tu ari siku kaban pengajar. Taja baru bekelala tang unggal Jimmy tu chukup kemerah. Aku dikangauka ia nemuai ngagai kebun chabi ia. Nya peluang ti chukup beguna ti sigi enda aku basau ngapa. Meda pemujur pengawa unggul Jimmy tu sereta jaku peransang ia, ati makin keran deka bekebun chabi ngena chara fertigasi.

Pejalai sigi enda mudah. Macham penanggul nuntung.

Maya ati keran sereta penemu menga mit udah ga bisi, tang siti penanggul besai ke selalu ngeregau runding aku ianya MARKET. Enti nyema aku muka kebun chabi dandang besai, kini tunga aku nyual asil ia? Ba tamu pasar Saratok? Jual ngagai bala kaban?

Enda chukup! Pasaran tauka market nya enda chukup. Enda alah chabi buruk ngapa nadai orang meli. Rugi besai enti baka nya. Ngelu pala berundingka baka ni deka mutar ke penekul nya.

KATI MUJUR TAUKA ENDA NIAT ATI AKU DEKA MUKA KEBUN CHABI FERTIGASI DANDANG BESAI?

Besambung...